Ársreikningur Skorradalshrepps fyrir árið 2024 var samþykktur af sveitarstjórn þann 21. maí 2025. Niðurstöður ársreikningsins endurspegla trausta rekstrarstöðu sveitarfélagsins og gott sjóðstreymi, sem veitir svigrúm til fjárfestinga án skuldsetningar.
Rekstrarniðurstaða A-hluta nam 36,3 milljónum króna sem er umtalsvert betri niðurstaða en árið 2023. Þegar litið er til samanlagðra reikningsskila A- og B-hluta nam rekstrarniðurstaðan 35,3 milljónum króna, sem er lækkun frá fyrra ári. Rekstrartekjur jukust þó um 14% milli ára, sem styrkir fjárhagslega stöðu sveitarfélagsins.
Veltufé frá rekstri A-hluta nam 34,3 milljónum króna og 39,6 milljónum króna frá rekstri A- og B-hluta samanlagt. Handbært fé frá rekstri A-hluta var 17 milljónir og 22,5 milljónir frá A- og B-hluta samanlagt. Fjárfestingar í varanlegum rekstrarfjármunum námu 3,9 milljónum króna og voru fjármagnaðar án lántöku.
Skuldir og skuldbindingar A-hluta námu 44,2 milljónum króna í árslok og skuldir og skuldbindingar í samanlögðum reikningsskilum A- og B-hluta námu 45,6 milljónum. Eigið fé í lok árs var 122,3 milljónir króna samkvæmt efnahagsreikningi A- og B-hluta, en 102,3 milljónir fyrir A-hluta eingöngu.
Skuldaviðmið samkvæmt reglugerð nr. 502/2012 er ekki reiknað fyrir sveitarfélagið þar sem veltufjármunir eru umfram skuldir og sveitarfélagið því í raun skuldlaust.